सातपूर पाईप गळती प्रकरणाची तात्काळ दखल; पाणीपुरवठा विभागाने मोठी गळती बंद केली
नाशिक लोकल : शिवाजी आढांगळे | सातपूर
सातपूर परिसरातील पाणीपुरवठा पाईप फुटल्याच्या घटनेची प्रशासनाने तात्काळ दखल घेतली असून नाशिक महानगरपालिका च्या पाणीपुरवठा विभागाने वेगाने कार्यवाही करत मोठी गळती बंद केली आहे. वृत्त प्रसिद्ध होताच संबंधित अधिकाऱ्यांनी घटनास्थळी पथक पाठवून तातडीने दुरुस्तीचे काम हाती घेतले.
सकाळपासून सुरू असलेल्या पाण्याच्या गळतीमुळे रस्त्यावर मोठ्या प्रमाणात पाणी साचले होते. मात्र दुरुस्ती पथकाने फुटलेल्या मुख्य लाईनचा भाग बदलून गळती पूर्णतः थांबवली. यानंतर परिसरातील पाणीपुरवठा पूर्ववत करण्यात आला असून नागरिकांनी समाधान व्यक्त केले आहे.
प्रशासनाने दिलेल्या माहितीनुसार, संबंधित भागात पुढील काही दिवस लाईनची तपासणी मोहीम राबविण्यात येणार आहे, जेणेकरून अशा घटना पुन्हा घडू नयेत. तसेच आपत्कालीन तक्रारींसाठी संपर्क यंत्रणा अधिक सक्षम करण्याचे निर्देशही देण्यात आले आहेत.
स्थानिक नागरिकांनी तातडीने दखल घेऊन कार्यवाही केल्याबद्दल समाधान व्यक्त केले असून भविष्यातही अशाच तत्परतेने काम व्हावे, अशी अपेक्षा व्यक्त केली आहे.
